ஓர் மலர், ஓர் பீடித்துண்டு , ஓர் அறிவு

"சரோஜா weds சாமுவேல்"
மலர்களாலான எழுத்துக்களில் 
எந்த மலரில் 
தன் ஆசைகளை தைத்திருப்பான்
அவன் ?

******
சொருகிப்போயிருந்த கண்கள் 
குழி விழுந்த கன்னம் 
கறுத்து தடித்த தோல்
அழுக்கு ஆடை, உச்சிவெயிலின் 
நீர்கண்டிரா தார்ச்சாலையில் 
ஒரு பீடித்துண்டு 
அவனை குடித்துக்கொண்டிருந்தது...

******
மாலை தனிமை எழுது
என்றான் நண்பன் ,
ஒரு மழை நாள் நடந்ததை எழுது
என்றது மனம்,
புரிதலே இல்லை 
எழுதி ஒன்றும் ஆவதில்லை 
அறைந்து சொன்னது 
ஆறாவது அறிவு !!

டிஸ்கி : இவை என் கிறுக்கல்கள் மட்டுமே...

அது

சொல்லமுடியா ஓர் உணர்வுக்குள்
சிக்கித்  தவிக்கிறேன்
இன்பத்திற்கு  அது இணையில்லை
‘வலி’ மட்டுமே  என்று  பெயரிடவிருப்பமில்லை
உணர்ந்து  பாருங்கள்
என்றுரைக்கமட்டேன்,
வெட்டவெளியில் உருவமில்லா
கருநிற இருளாய் 
ஒவ்வொரு இரவும் என்னை
ஆட்கொள்(ல்)கிறது ... 
ரத்தமும்  சதையுமாய் மட்டுமே
நான் படைக்கப்பட்டிருக்கிறேன்
எதைத் தேடியே  என் பயணம்?
ஒலிக்க முடியா நேரத்தில்
ஆயிரம் வயலின்களின்  ஒட்டுமொத்த
இசையும் நரம்பறுத்த
நொடியில்  என்னுடன்
படுக்கையைப்
பகிர்ந்துவிடுகிறது
அந்த உணர்வு...  
“அது” என உணர்வுக்குப்
பெயரிட்டு
நாளையேனும் 
நான் நானாய்  வாழ்வேனென
ஒவ்வொரு   விடியலிலும்
என்னை நானே பிரசவிக்கிறேன் !!!! 


நன்றி : http://uyirmmai.com/Uyirosai/Contentdetails.aspx?cid=3556

சாத்தான் படலம்

அழுது நனைத்த

தலையணையில்

உமிழ்ந்து படர்கிறது

இரக்கமின்மை

பிரிவு குறித்த

சேதி சொல்லி

எக்களிக்கும், தெறித்து பிரிந்த

மின்னல் கீற்றுகள்

இருவழிப் பாதையில்

நடுக்கோட்டின் வழியே

தனியே நகரும்

மனம்

ஆடி களிக்க

வார்த்தை விளையாட்டு உனக்கு,

அலரி அழ 'ஆ, ஊ ,ஓ..' போதுமே

எனக்கு

எச்சமிடம் ஓலத்தின்

நாயகனாய் போயிருந்த

தனிமை ,

காதல் தொலைத்து

முக்கி முனகி, மீண்டு எழ

அனைவருக்கும் தேவதையாகி

போன தருணத்தில் எனக்கு நான்

சாத்தனாகி போயிருந்தேன் !

நன்றி : http://www.thinnai.com/?module=displaystory&story_id=310081511&format=html

அன்றொரு மழை நாள் II

செல்லச் சண்டையின்
சிணுங்கள் கோபங்கள்
சுழித்துப் போன உதட்டில்
விழுந்து போன முதல்
மழைத்துளி

அழிந்து போன
ஆணவக் கூறுகள்
அசைத்துப் போனது
ஆசையின் வேர்களை
"ச்சீய்... போடா .."
என்ற வார்த்தையினூடே
ஈரமாகி போயிருந்தன
சண்டையிட்ட
உதடுகள்!

நன்றி :http://youthful.vikatan.com/youth/Nyouth/aarthipoem310710.asp

அன்றொரு மழை நாள் I

சன்னலோர கம்பிகளின்
மழைத் துளி வழியே 

பயணம்

தேனீர் கோப்பையும்
தீராத தாகமுமாய்
தனித்து விடப்பட்டு
நினைவுகளை
அள்ளி பருகிக்கொள்கிறேன்

துளிர்த்துக் கிளம்பும்
மண்வாசனையோடு - இதயம்
வெடித்துக்கிளம்பும்
என் விதிகளுக்கு அடங்காத
எண்ணங்கள்

கொட்டிதீர்க்கும் மழையினூடே
உலர்ந்த உள்ளமுமாய்
ரகசியமாய் என் கண்ணீரும்
உலவி போகும் உணர்வுகளற்ற
உதட்டு புன்னகை
முழுவதையும் கரைக்க
மழையும் முயற்சிகிறதோ?


நன்றி :http://youthful.vikatan.com/youth/Nyouth/aarthipoem310710.asp

இருள் உமிழும் தனிமை

இருட்டறையின்
நிசப்த கொலைக்கு
சாட்சியாய் வெளியேறுகிறது
என் தலையணை நனைக்கும்
கண்ணீர்த் துளி!!

 ***
நித்திரையில்லா
நடுநிசியில்
வார்த்தை  பிச்சைக்காரி
என்னிடம்,
எச்சில் உமிழ்கிறது
என் எதிர்ப்பார்ப்புகளை
இழுத்துச் சுத்தும்
அறை காத்தாடி!!

 ***
இருளில் கழித்த
தனிமைக்கு
எனை விற்ற விலையின்னும்
தெரியவில்லை!!
தனிமையை கையகப்படுத்திட
என் பேனாவிற்கு
வெற்றுத்தாள் துணைவர
அமையவில்லை!!!
விற்றதற்காகவும் தொலைத்தற்காகவும்
அழுது தீர்க்கிறோம்
நானும் என் பேனாவும்!!
 ***
என் அறையின்
ஒவ்வொரு மூலையின்
சமிக்ஞையையும் சுட்டிக்காட்டுகின்றன
ஒவ்வொரு இரவின்
தனிமை மரணத்தையும்
ஒவ்வொரு பொழுதின்
தனிமை விடியலையும்!!

 ***
ஒரு மழை நாளின் 
சன்னலோர துளியோடு
இசைந்து போகவும்
அசை போட நினைவுமாய்
பயணத்தை சுமக்க
எத்தனிக்கிறேன்!!

நன்றி : http://www.keetru.com/index.php?option=com_content&view=article&id=9966:2010-07-15-01-57-42&catid=2:poems&Itemid=265

படிக்கட்டு

அந்தப் படிக்கட்டின்
ஒவ்வொரு வளைவுகளும் 
உனக்காக காத்திருந்து 
என் விரல் உரசிய 
கைப்பிடியை எள்ளி 
நகையாடுகின்றன!

மழையின் 
முதல் துளி தொடங்கி
சீற்றம் வற்றிய
கடைசித் துளி வரையிலான
அமைதியையும் இரைச்சலையும் 
பார்த்தாகிவிட்டது !

கடந்து போகிறேன்
ஒவ்வொரு படியும்
ஒவ்வொரு நினைவாய்
திரும்பி பார்க்கையில்
தொற்றிக் கொள்கிறது
ஓர் அசூயை !

கேட்டு முடித்த வார்த்தைகளும்
சொல்ல துடித்த இதயமும்
வந்து விழுகிறது 
கண்ணீராய்!!
*
நன்றி : http://youthful.vikatan.com/youth/Nyouth/aarthypoem070710.asp